Адкуль назва. Калдычэва

У рубрыцы "Адкуль назва" успамінаем гісторыю паходжання назваў населеных пунктаў Баранавіцкага раёна. Сёння раскажам пра вёску Калдычэва.

BAR24 распачаў рубрыку «Адкуль назва». Каб жыхары нашага рэгіёну ведалі не толькі назвы вёсак і аграгарадкоў, але і іх гісторыю. І працягвае рубрыку вёска Калдычэва.

Навукоўцы, якія займаюцца тапанімікай, часта падзяляюць назвы населеных пунктаў на групы. У залежнасці ад іх паходжання. Да адной групы, да прыкладу, адносяць назвы вёсак, якія пайшлі ад рэк ці азёр. Другой – тыя, што ўтварыліся ад асаблівасцей мясцовасці. Да трэцяй – назвы, утвораныя ад імёнаў і прозвішчаў людзей. І гэтак далей.

Але ў дачыненні да паходжання назвы вёскі Калдычэва меркаванні навукоўцаў разыходзяцца. Адныя лічаць, што назву вёсцы дало Калдычэўскае возера, якое знаходзіцца непадалёк. Другія схіляюцца да таго, што Калдычэва ўтварылася ад прозвішча чалавека. Так, Жучкевіч у сваім “Кароткім тапанімічным слоўніку” сцвярджае, што назва Калдычэва пайшла ад прозвішча Калдычэў.

Даследаванні ж гісторыкаў указваюць на тое, што назва сапраўды магла пайсці ад чалавека. Але, хутчэй, не ад прозвішча, а ад асабістага імя. Справа ў тым, што ў часы ВКЛ на землях, дзе знаходзіцца Калдычэва, жылі татары. І ў слоўніку асабістых татарскіх мужчынскіх імёнаў можна знайсці імя Калды. Што можна перакласці як “застаўся ў жывых”. Кажуць, імем Калды ў старыя часы называлі хлопчыкаў, якія выжылі пасля нейкай цяжкай хваробы. Магчыма, менавіта ад аднаго з такіх Калды і пайшла назва вёскі Калдычэва.

Глядзіце таксама: Адкуль назва. Арабаўшчына

• Мы в соцсетях