Стрэлы ў цэнтры горада, канцэрт прымадонны і крадзяжы. Агляд старых газет за кастрычнік 1933 года

Што адбывалася ў Баранавічах 90 год таму – па матэрыялах тагачасных СМІ.

Kurjer Nowogródzki

6 кастрычніка

Канцэрт славутай спявачкі

9 кастрычніка а 19.30 у зале кінатэатра Apollo адбудзецца канцэрт славутай спявачкі Ванды Вермінскай.

Ванда Вермінская (18 лістапада 1900 — 30 жніўня 1988 ) — польская оперная спявачка, меца-сапрана, драматычнае сапрана, прымадонна даваеннага Вялікага тэатра ў Варшаве. З пачаткам вайны з’ехала ў Італію, а пасля у ЗША. Вярнулася ў 1949, але яе не выпускалі на сцэну і ў 1951 годзе звольнілі з тэатра.

9 кастрычніка

Пажар

6 кастрычніка а 22 гадзіне з-за неасцярожнага абыходжання з агнём распачаўся пажар у сядзібе братоў Блашчэвічаў. У выніку згарэў свіран з сёлетнім ураджаем і сельскагаспадарчымі прыладамі. Падчас тушэння Нікіфар Блашчэвіч атрымаў лёгкія апёкі твару і рук.

13 кастрычніка

Будова касцёла ў Лясной

8 кастрычніка Аб’яднанне стральцоў пры станцыі Лясная на заклік Камітэта пабудовы касцёла ладзіла прадстаўленне “Konsyljum fakultatis”. Пасля прадстаўлення адбыліся танцы разам з латарэяй. Увесь прыбытак у суме каля 200 злотых перадалі на пабудову касцёла ў Лясной.

У магістраце дадалося дзіця

6 кастрычніка а 22.30 было пакінута немаўля. Хлопчык прыкладна двух месяцаў быў перададзены ў дзіцячы прытулак.

Зіма блізка, трэба падрыхтавацца

8 кастрычніка Рыўка Нінковэр паведаміла ў камісарыят паліцыі, што ў яе скралі паліто са скунсавым каўняром вартасцю каля 300 злотых.

Варварства

У ноч на 27 верасня на пашы каля в. Жарабковічы гміны Ляхавічы нехта адсёк 13 коням хвасты.

18 кастрычніка

З’езд гаспадарчых і грамадскіх дзеячаў

11 кастрычніка ў залі кінатэатра Apollo у прысутнасці прадстаўнікоў улады (а менавіта прадстаўніка пана ваяводы, кіраўніка аддзелу бяспекі п. Ясянскага, пана старасты Нэўгебаўэра, паслоў і сенатараў зямлі Навагрудскай і 282 дэлегатаў з горада і павету) адбыўся з’езд гаспадарчых і грамадскіх дзеячаў.

Памёр ад ран

12 кастрычніка ў міжкамунальным шпіталі ў Баранавічах памёр ад атрыманых ран Антон Шаматульскі. Ён атрымаў траўму 29 верасня трансмісійным пасам на млыне Б. Рэзніка ў вёсцы Тартакі.

Конь, збруя і воз

У ноч на 14 кастрычніка жыхар горада Баранавічы Мікалай Букша накіраваўся з гасцявым візітам ў гміну Вольна. У вёсцы Клонпікі ён скраў у Аляксандра Петрашкевіча кабылу. Потым у Антона Клімашэўскага з зачыненага хлява – збрую. А ў вёсцы Макашы забраў з хлява Антона Нядзелькі воз і бурку.

Маючы ўсё гэта, ён запрог воз і паехаў да Баранавіч. Але даехаў да горада ўжо ў суправаджэнні… але не да хаты, а ў вязніцу, дзе чакае выраку суду.

22 кастрычніка

Загадкавае знікненне дзіцяці

18 кастрычніка а 10-й гадзіне з падворка фальварка Сухарэбшчына гміны Ястрамбель знікла трохгадовая Яніна Ігнатовіч. Не гледзячы на распачатыя пошукі, дзіця так і не знайшлі. Ёсць меркаванне, што дзіця загрызлі ваўкі.

25 кастрычніка

Канкурэнт дзяржаўнага манетнага двара

21 кастрычніка быў затрыманы жыхар вёскі Дарава Ян Кашук, якога падазраюць у выпуску і ўводзе ў абарачэнне фальшывых 1-злотавых манет.

27 кастрычніка

Таямнічае самагубства

У лесе, у так званым “Гаю” Сталовіцкай гміны павесіўся мужчына. Яму прыкладна 30 гадоў, высокі, шчуплы, апрануты ў блузу з ціку цёмна-сіняга колеру, порткі колеру хакі і чорныя боты з халявамі.

Побач знайшлі скураную шапку, бутэльку аб’ёмам 250 мл, дзе заставалася 2-3 кілішка гарэлкі.

Пад кустамі знайшлі чорную скураную куртку, у правай кішэні якой была луста хлеба з наклейкай “Кампанія па эксплуатацыі пякарні Most, былой Н. Гродзенскай. Варшава-Прага, вул. Паненская, 9”.

У задняй кішэні порткаў знайшлі 8 злотых 25 грошай у скураным партманэ. Ніякіх дакументаў пры мужчыне не было. Нябожчык павесіўся на скураным пасе, прымацаваным дротам да яліны.

Вушы і рукі пагрызены ляснымі мышамі. Твар нябожчыка пачаў раскладацца. Магчыма, самагубца паходзіць з Варшавы. Прычына самагубства – невядомая.

20 лістапада

Гісторыя двух разбітых шыб

27 кастрычніка а 11 гадзіне на вуліцы Шаптыцкага (цяпер Савецкая) Мойша Граеў, вучань гімназіі Эпштэйна, маніпуліруючы рэвальверам нечакана стрэліў.

Куля прабіла дзве шыбы ў краме Віткоўскага.

Той рэвальвер з’яўляўся ўласнасцю Марья’на Вольскага, які валодаў ім нелегальна і пакінуў за даўгі Берцы Курхіну. Той жа паказаў яго Граеву, які нарабіў столькі бяды.

Злодзей будзе мець, што паесці

У ноч на 23 кастрычніка ў Юзэфа Садоўскага, што жыве ў асадзе Красевічы гміны Гарадзішча, скралі са склепа 48 сыроў галандскіх. Іх вартасць – 120 злотых.

27 кастрычніка ў Канстанціна Граноўскага з в. Крупляны з зачыненага хлява скралі карову вартасцю 100 злотых.

Чытайце таксама: Дзве авіякатастрофы і знойдзены скарб. Агляд старых газет за верасень 1933 года

Цыганскі кароль, цырк і новы герб горада Баранавічы. Агляд старых газет за жнівень 1933 года

 Банкруцтва банка і конныя спаборніцтвы. Агляд старых газет за ліпень 1933 года

Смерць ад пчол і быка ды забруджаны парк. Агляд старых газет за чэрвень 1933 года

Палёты над Баранавічамі і конь на рэйках. Агляд старых газет за май 1933 года

Забытая гісторыя знакамітага мясакамбіната ў Баранавічах

Вы можете обсудить статью в нашем паблике ВКонтакте или Одноклассниках. Подписывайтесь на наш телеграм-канал или инстаграм. Смотрите наши ролики на Youtube, пишите и присылайте фото в наш телеграм-бот @bar24_bot.

• Мы в соцсетях